Jer 18 | ZomZIV | STEP | Hih in TOPA tung pana Jeremiah tunga tung thu ahi hi:

Jeremiah 18

Beelseekpa’ Innah

1 Hih in TOPA tung pana Jeremiah tunga tung thu ahi hi: 2 Beelseekpa innah paisuk in, tua lai-ah ka thupuak kong pia ding hi,” hong ci hi. 3 Tua ciangin beelseekpa innah ka paisuka lengpei tunga a sep laitak ka tuak hi. 4 Ahi hangin beel dinga a bawlsa a khut sunga tungman a kisia hi; tua ciangin beelseekpa in beel dang khat dingin bawl kika ama deih bangbangin a seek hi.

5 Tua ciangin TOPA thu kei tungah hong tunga: 6 “Israel innkuante aw, hih beelseekpa hih bangin nang hong hih thei hi lo ka hi hiam?” TOPA in cikhia hi, “Israel innkuante aw, beelseekpa tungman bangin no zong ka khut sungah na om uh hi. 7 Minam khat ahi a, kumpi-gam khat ahi zongin botkhia-in, khenkhamin, suksiat dingin, hun khat lai-a ka zaksaksa ahi zongin, 8 tua ka vauhilh minamte a gitlohna panun a kisik uh leh tua ciangin ka khel kik dinga, ka geelsa siatna ka tuaksak kei ding hi. 9 Tuateh hun dang khatah minam khat ahi a, kumpi-gam khat ahi zongin lam ding le suan dingin ka zasak khin zongin, 10 ka muhna ah gitlohna a gamtat-a ka thu hong man kei leh, tua ciangin ama adingin bawl ka sawm na hoih ka ngaihsun pha kik ding hi. ^a

11 Tua ahi ciangin tu-in Judah mite tung le Jerusalem a tengte tungah gen in, ‘Hih in TOPA gen ahi hi: En un, note tungah siatna tunsak ding ngimna khat nei dingin ka kithawi hi. Tua ahi ciangin note na vekun na gitlohna panun kihei unla na omzia uh le na nasep uh kibawlpha un,’ ci in. 12 Ahi hangin amaute in, ‘Khiatna nei kei, ka sawmsa bangun semsuak lel nung; ka vekun komau gitloh lungsim khauhna mah zui lel nung,’ hong ci ding uh hi,” a ci hi. ^b

13 Tua ahi ciangin TOPA gen hih ahi hi:

“Minamte lakah kan dih un:
Hih bang thu a za a om kha hiam?
Nungak bit Israel in ^c
a mulkimhuaipen na sem khin ta hi. ^d
14 Lebanon a suangken,
vuk tawh kilawi ngei ahi hiam?
Gamlapi pana luang
tua tuivot kang ngei ahi hiam? ^{▼▼18.14 Hebrew ah hih laigual a khiatna kician lo hi.}
15 Tua hi napi ka mite in
kei hong mangngilh uh a; ^f
amaute lampi le tanglai lampite ah amaute a muktusak kimanna
a nei lo milimte tungah gimnamtui a hal lailai uh hi. ^g
Tuate in amau lampi dinga kisial pen tawnsak loin,
lamkhem pen a tawnsak hi.
16 Amaute gam gamvalin kikoih dinga,
a kithusim nawn kei ding hi;
a tawnkha peuhmah in mullitin
a lu uh a peisan ding uh hi.
17 Nisuahna lam huih bangin
a galte uh mai-ah amaute ka thehthang ding hi;
amaute gim thuak ni ciangin
ka maitang lam ngat loin ka nungngatsan ding hi,” hong ci hi. ^h

18 Amaute in, “Hong pai un, siampite hong hilh thukham, mipilte i dot thute, kamsangte gen thute a manthan loh nadingin Jeremiah sawmsim ni. Tua hi a hong pai un, i kam mahmah tawh nialin a gen peuhmah va thusim kei ni,” a ci uh hi.

19 TOPA aw, ka thugen hong ngai inla;
kei hong mawhsakte thugen za in! ⁱ
20 Gitlohna, thu hoiha thuk ding mah ahi hiam? ^j
Tua hi napi kei kiat nading gum a to uh hi. ^k
Na thangpaihna amau tungah a tun loh nadingin
nangma mai-ah dingin ^l
amau tanga kong gensak lam phawk in.
21 Tua hi-in a tate uh kialpi vatsak inla; ^m
amaute namsau vangliatna-in beisak in. ⁿ
A zite uh ta nei lo le meigongin omsak in;
a mite uh sisak inla,
a khangnote uh gal sungah namsau in kithatsak in. ^o
22 Amaute thakhata sim ding na kuansak ciangin
a innte uh panin kahna aw kizasak in, ^p
ahang in, kei mat nading dum to uh a,
ka khe awk nadingin thang siah sim uh hi. ^q
23 Ahi hangin TOPA aw,
kei thah hong sawmna khempeuh uh nang na thei hi.
Amaute khialhna maisak kei inla
amaute mawhna nang muhna panin phiatkhiatsak kei in;
na mai-ah lawnthal inla
na heh hun mahin thuaksak pah ek in. ^r